तुलसीपुर महोत्सवमा आज चर्चित गायिका ज्योती मगर आउँदै

दाङ । दाङको तुलसीपुरमा जारी ‘प्रथम तुलसीपुर महोत्सव’मा आज १६ औँ दिनमा चर्चित लोकदोहोरी गायिका ज्योति मगरको विशेष प्रस्तुति रहने भएको छ।

प्रचारप्रसार समितिका संयोजक तिलकराज ओलीका अनुसार  महोत्सवको १६ औँ दिनमा प्रमुख आकर्षणका रूपमा ज्योति मगरको साङ्गीतिक प्रस्तुति रहनेछ। यसैगरी अन्य कलाकारहरूमा कमल बी.सी माइलदाई लगायतको विशेष प्रस्तुति रहनेछ।

यसैबीच मङ्गलबार बिहानैदेखि साँझपखसम्म चिसो बढ्दै गए पनि दर्शकहरूको उत्साहमा कुनै कमी देखिएको थिएन । गायक बद्रि पंगेनीले आफ्ना हिट गीतहरू गाउँदै गर्दा दर्शकहरूले सँगसँगै गीत गाएर साथ दिएका थिए । त्यसैगरी, टिका सानु र एमटी महरले आफ्ना चर्चित गीतहरू गाउँदा दर्शक दीर्घामा रहेका युवायुवतीदेखि वृद्धवृद्धासम्म नाचेर साथ दिएका थिए ।

नेपाल घरेलु तथा साना उद्योग महासंघ तुलसीपुरको आयोजनामा पुस ४ गतेदेखि सञ्चालित यस महोत्सवमा दैनिकरुपमा दर्शकको उल्लेख्य सहभागीता हुने गरेको महोत्सव मूल आयोजक समितिका संयोजक लाल बहादुर केसीले बताउनुभयो । महोत्सव मूल आयोजक समितिका संयोजक लालबहादुर केसीका अनुसार कलाकारहरूको प्रस्तुतिले दर्शकको आकर्षण बढाउँदा व्यापारिक गतिविधिमा समेत सकारात्मक प्रभाव परेको छ ।

चिसोका कारण मानिसहरू घरबाहिर निस्कन हिचकिचाएका बेला महोत्सवको रौनकले थप ऊर्जा थपेको महोत्सव मूल आयोजक समितिका सदस्य सचिव भद्र बहादुर वलीले बताउनुभयो ।

महोत्सवमा भोलि नायक पल शाह सँगै अन्य थुप्रै चर्चित कलाकारहरु आउने साँस्कृतिक संयोजक टिकाजंग वलीले बताउनुभयो ।