नेपाल उद्योग व्यापार महासंघको स्थापना दिवसमा विद्यार्थीलाई कापी–कलम वितरण

दाङ । शिक्षा क्षेत्रमा सामाजिक उत्तरदायित्वलाई प्राथमिकता दिँदै तुलसीपुर उद्योग व्यापार संघले नेपाल उद्योग व्यापार महासंघको पाँचौँ स्थापना दिवसको अवसरमा तुलसीपुर उपमहानगरपालिका–५, गैरापातुस्थित श्री जनश्रमिक आधारभूत विद्यालयका विद्यार्थीहरूलाई कापी तथा कलम वितरण गरेको छ।
विद्यार्थीहरूको अध्ययनलाई थप सहज, प्रभावकारी र प्रेरणादायी बनाउने उद्देश्यले आयोजित कार्यक्रममा विद्यालय व्यवस्थापन समितिका अध्यक्ष वेद प्रसाद वलीको अध्यक्षता रहेको थियो।

कार्यक्रममा नेपाल उद्योग व्यापार महासंघका केन्द्रीय सचिव मिनराज भण्डारी प्रमुख अतिथि तथा महासंघका केन्द्रीय सदस्य शेषकान्त ढकाल विशिष्ट अतिथिका रूपमा सहभागी हुनुभएको थियो।
त्यसैगरी विद्यालयका प्रधानाध्यापक सुशिला भट्टराई, शिक्षक, विद्यार्थी, अभिभावक तथा तुलसीपुर उद्योग व्यापार संघका पदाधिकारीहरूको उपस्थिति रहेको थियो।
कार्यक्रममा विद्यालय परिवारले शिक्षा क्षेत्रमा निजी क्षेत्रको यस्तो सहयोग सामाजिक उत्तरदायित्वको उत्कृष्ट उदाहरण भएको उल्लेख गर्दै आगामी दिनमा पनि यस्ता सहयोगमूलक कार्यक्रमलाई निरन्तरता दिन आग्रह गरेको थियो।
तुलसीपुर उद्योग व्यापार संघका कोषाध्यक्ष इन्द्रबहादुर बस्नेतले स्वागत मन्तव्य व्यक्त गर्नुभएको कार्यक्रमको सञ्चालन महासचिव कृष्णबहादुर पुनले गर्नुभएको थियो।