तुलसीपुर मालपोत कार्यालयमा आइतबारदेखि सरसफाई सुरु

२९ भदौ, तुलसीपुर। जेन जि आन्दोलनका क्रममा भदौ २४ गते आगलागी भई पूर्ण रूपमा नष्ट भएको तुलसीपुर मालपोत कार्यालयमा आजदेखि सरसफाई सुरु गरिएको छ।

नेपाल लेखापढी कानुन व्यवसायी एशोसियसन इकाई समिति तुलसीपुरका व्यवसायी तथा मालपोत कार्यालयका कर्मचारीहरूले संयुक्त रूपमा सरसफाई कार्य अघि बढाएका हुन्।

तुलसीपुर उपमहानगरपालिका–६ अमिलिया रोडस्थित भाडाको भवनमा सञ्चालन हुँदै आएको मालपोत कार्यालयमा आगलागी हुँदा बबई, दंगिशरण, शान्तिनगर गाउँपालिका र तुलसीपुर उपमहानगरपालिका क्षेत्रका जग्गाधनीसँग सम्बन्धित महत्वपूर्ण कागजात (मोठ, श्रेष्ता, तामेली आदि) र फर्निचर जलेर नष्ट भएका थिए। केही आधा जलेका कागजात भने संकलन र व्यवस्थापन गरिएको सूचना अधिकारी शान्तराज गौतमले जानकारी दिनुभयो।कार्यालय पूर्ण रूपमा जलेको कारण तत्काल सेवा सञ्चालन गर्न नसकिने र केही दिनसम्म बन्द रहने उहाँले बताउनुभयो।

यसैबीच, मालपोत कार्यालय नजिकै रहेका नेपाल लेखापढी कानुन व्यवसायीहरूको करिब २० वटा सटरमा पनि आगजनी हुँदा झन्डै ५० लाखभन्दा बढीको क्षति भएको अध्यक्ष विनोद न्यौपानेले जानकारी दिनुभयो। उनका अनुसार सेवाग्राहीहरूले छोडेर गएका सक्कल नागरिकता, लालपुर्जा र लिखतजस्ता महत्वपूर्ण कागजातसमेत जलेर नष्ट भएका छन्।

त्यस्तै, नजिकैका किराना पसल र नास्ता पसलसमेत आगलागीबाट क्षतिग्रस्त भएका छन्। आन्दोलनकारीहरूले मालपोत कार्यालयसँगै उच्च अदालत तुलसीपुर र लोक सेवा आयोगको कार्यालयमा समेत आगजनी गरी पूर्ण रूपमा ध्वस्त बनाएका छन्।