दाङमा उद्योग व्यवसाय महासंघको जिल्ला बैठक सम्पन्न

दाङ । नेपाल उद्योग व्यवसाय महासंघ दाङ जिल्ला समितिको बैठक घोराही उपमहानगरपालिका-१५ स्थित उद्योग वाणिज्य संघको सभाहलमा भव्यताका साथ सम्पन्न भएको छ।

बैठक दाङ जिल्ला अध्यक्ष डिल्ली बहादुर वलीको अध्यक्षतामा र महासंघका केन्द्रीय उपाध्यक्ष ओपेन्द्र बहादुर महराको प्रमुख आतिथ्यमा सम्पन्न भएको हो। कार्यक्रममा विभिन्न पालिकाका अध्यक्षहरूले आ–आफ्नो प्रतिवेदन प्रस्तुत गरेका थिए।

बैठकले महासंघलाई चुस्त–दुरुस्त बनाउन पालिका स्तरमै सक्रिय भई जिम्मेवारी निर्वाह गर्नुपर्नेमा जोड दिएको छ। तुलसीपुर नगर कमिटी अध्यक्ष वेदप्रसाद ओलीले संगठन दर्ता नगरी अगाडि बढ्न कठिनाइ हुने बताउँदै दशैं–तिहारअघि नै नगर कमिटी दर्ता गर्ने प्रतिबद्धता व्यक्त गरे।

कार्यक्रममा केन्द्रीय सदस्य तथा दाङ जिल्ला इन्चार्ज मिनराज भण्डारीले आत्मनिर्भर व्यवसायिक व्यवस्थापन आवश्यक रहेको र संगठन बलियो भइसकेकाले अब कसैसँग डराउन नपर्ने धारणा राखे।

त्यस्तै, प्रदेश कमिटी सदस्य शेषकान्त ढकालले संगठनलाई सबल बनाउन “एक व्यक्ति, एक पद” नीति लागू गर्नुपर्ने सुझाव दिए। प्रदेश कमिटी सदस्य जया रावलले निम्न वर्गका व्यापारीहरू दोहोरो करको मारमा परेको भन्दै समस्या समाधानका लागि महासंघले पहल गर्नुपर्नेमा जोड दिइन्।

समापन भाषणमा केन्द्रीय उपाध्यक्ष महराले दाङका सबै पालिकामा संगठन विस्तार भइसकेकाले अब वडा स्तरमै कमिटी गठन गर्नुपर्ने बताए। उनले व्यवसायलाई सबल बनाए मात्रै संगठन मजबुत हुने उल्लेख गर्दै दाङलाई नमुना जिल्लाका रूपमा विकास गर्ने प्रतिबद्धता व्यक्त गरे।

बैठकको समापन जिल्ला अध्यक्ष डिल्ली बहादुर वलीले गर्दै असोज ४ गते घोराहीस्थित होटल मालायनमा दशैं–तिहार शुभकामना आदान–प्रदान कार्यक्रम आयोजना गर्ने निर्णय भएको जानकारी दिए।

कार्यक्रमको सहजीकरण जिल्ला महासचिव विकास वलीले गरेका थिए।