सल्यानमा एमाले विधान संशोधनबारे सुझाव संकलन

सल्यान । नेपाल कम्युनिष्ट पार्टी (एमाले) को दोश्रो विधान महाधिवेशनमा हुने विधान संशोधन प्रस्तावमाथि सल्यानमा सुझाव संकलन भएको छ । मंगलबार सदरमुकाख मलंगा स्थित एमालेको पार्टी कार्यालयमा सम्पन्न जिल्ला कमिटीको बैठकमा विधान संशोधनका सम्बन्धमा आएका सुझावहरू संकलन गरी माथिल्लो तहमा पठाउने निर्णय गरिएको जिल्ला कमिटी उपाध्यक्ष ओज बहादुर बुढाथोकीले जानकारी दिए ।

गत साउन २ र ३ गते सम्पन्न पोलिट्ब्युरोको निर्णय अनुरूप विधान संशोधनका सम्बन्धमा प्रदेश कमिटी, स्थानीय कमिटी र पार्टी सदस्यहरूबाट लिखित सुझाव प्राप्त गर्न केन्द्रीय कमिटी बैठक समक्ष प्रस्तुत गरिएको प्रस्ताव जिल्ला कमिटीमा आएकोमा त्यसमाथि छलफल र सुझाव संकलन गरिको एमाले सल्यानले जनाएको छ ।

बैठकमा प्रदेश कमिटी सदस्यहरू, जिल्ला कमिटी पदाधिकारी तथा जिल्ला कमिटी सदस्यहरूको सहभागिता रहेको थियो । सहभागीहरूले पार्टी संगठनलाई थप मजबुत र प्रभावकारी बनाउनुपर्नेमा जोड दिएका थिए । बैठकमा वडास्तरीय संगठनात्मक समीक्षाबारे प्रतिवेदन प्रस्तुत गरी छलफल गरिएको जिल्ला कमिटी सचिव पुष्पा कुमारी वोहोराले जानकारी दिइन् ।

बैठकका प्रमुख अतिथी नेकपा एमाले कर्णाली प्रदेश कमिटीका अध्यक्ष गुलावजङ शाहले पार्टी संगठनलाई मजबुत बनाउन सबै तहका कार्यकर्ताले आआफ्नो जिम्मेवारी पूरा गर्नुपर्नेमा जोड दिए । उनले संगठनात्मक सुदृढीकरणसँगै नागरिकको पक्षमा निरन्तर काम गर्दै जाने पार्टीको नीति र कार्यक्रमलाई प्रभावकारी बनाउन निर्देशन दिए ।

यस्तै जिल्ला कमिटी अध्यक्ष भिम बहादुर सेनले एमालेलाई नागरिकले दिएको विश्वासलाई कायम राख्न जिल्ला कमिटी जिम्मेवार ढंगले लागेको भन्दै वडास्तरदेखि प्रदेश तथा केन्द्रसम्मको संगठनलाई एकताबद्ध र गतिशील बनाएर जनताको अपेक्षा पूरा गर्नुपर्ने आवश्यकता औल्याए ।

जिल्ला कमिटीको छैठौँ पूर्ण बैठकले जिल्लाभर पार्टीको जनसंगठनलाई सक्रिय बनाउने, नागरिकसँग प्रत्यक्ष सम्पर्क अभिवृद्धि गर्ने बारे विशेष जोड दिएको छ । स्थानीय तहमा जनप्रतिनिधिहरूको भूमिकालाई अझै जिम्मेवार बनाउने तथा आगामी दिनमा हुने पार्टी गतिविधि र कार्यक्रमहरूलाई व्यवस्थित ढंगले अघि बढाउने लगाएतका निर्णय गरेको एमाले सल्यानले जनाएको छ ।