मिर्गौला फेर्न आर्थिक अवस्था कमजोर भएपछि बिक परिवारले गर्‍यो सहयोगको अपिल

दाङ । तुल्सीपुर उपमहानगरपालिका वडा नम्बर ८ टिकरी निवासी ५० वर्षीय आसाराम बिक विगत पाँच वर्षदेखि दुबै मिर्गौला फेल भई डायलाइसिसमा आश्रित जीवन बिताइरहनुभएको छ। आर्थिक अभावका बीच सहयोगी मन र हातहरूको सहारामा उहाँले हालसम्म डायलाइसिस गर्दै आउनुभएको हो।

तर अहिले अवस्था झन जटिल बन्दै गएको उहाँले बताउनुभयो। डायलिसिसका लागि प्रयोग हुँदै आएको फिस्टुला परिबर्तन गर्न नमिल्ने भएकोले डाक्टरको सल्लाह अनुसार यथाशीघ्र मिर्गौला प्रत्यारोपण (ट्रान्सप्लान्ट) गर्नु आवश्यक भएको छ। डाक्टरहरूले एक महिनाभित्र मिर्गौला फेर्नुपर्ने सुझाव दिएका छन्।

हाल आफ्नै बहिनीले मिर्गौला दिन तयार भएको परिवारले जनाएको छ। तर, प्रत्यारोपणको सम्पूर्ण प्रक्रिया र उपचार खर्च बेहोर्न सक्ने आर्थिक अवस्था परिवारसँग छैन। मृगौला प्रत्यारोपण गर्नको लागि झन्डै १२ देखि १५ लाख लाग्ने उहाँले बताउनुहुन्छ।विक परिवारले देश–विदेशमा रहेका सबै नेपाली दाजुभाइ, दिदीबहिनी, संघसंस्था, समाजसेवी, र सहयोगी मनहरूलाई सहयोगका लागी अपिल गरेको छ।

मलाई बचाइदिनुस्। म बाँच्न चाहन्छु। मलाई जीवनदान दिनुहोस् मेरो परिवारमा म बाहेक कमाउने कोही छैन। म रहेन भने मेरो परिवार को के दशा होला ? भन्दै सानो सहयोगले हाम्रो परिवारमा ठूलो खुसी ल्याउन मद्दत पुग्ने उहाँको भनाइ रहेको छ ।उहाँलाई साथ र समर्थन सहयोगी हातहरूको सहयोग गर्नका लागि ९८४४९६५२४८मा सम्पर्क गर्न सकिने उहाँको परिवारले जनाएको छ।