तुलसीपुर–२ मा आरन मेसिन वितरण, कारीगरहरू उत्साहित

दाङ । तुलसीपुर उपमहानगरपालिका वडा नं. २ ले स्थानीय कारीगरहरूलाई स्वरोजगार तथा सिपमा आधारित आयआर्जनमा प्रोत्साहन गर्ने उद्देश्यले चार थान मोटरयुक्त आरन इलेक्ट्रिक मेसिन (Motorized Electric Blower No. 25) वितरण गरेको छ।

शुक्रबार एक कार्यक्रमका बीच वडा अध्यक्ष भीम बहादुर योगिको अध्यक्षतामा लाभग्राहीहरूलाई फलामका औजार बनाउन प्रयोग हुने आरन मेसिन वितरण गरिएको हो। कार्यक्रममा वडा सदस्य मोहन डागी, महिला सदस्यहरू हुमा घर्ती र माया सुनार, वडा कर्मचारी तथा स्थानिय लाभग्राहीहरूको उपस्थिति थियो।

चार जना लाभग्राहीहरू भीम बहादुर बिक, सरिता बिक, चित्र बहादुर बिक र सालिकराम सुनारलाई आरन मेसिन प्रदान गरिएको हो। उनीहरूलाई मेसिन सञ्चालन सम्बन्धी आवश्यक तालिमसहित उपकरण हस्तान्तरण गरिएको वडा कार्यालयले जनाएको छ।

कार्यक्रममा बोल्दै वडा अध्यक्ष योगिले प्राविधिक सीप भएका तर साधन नपुगेका व्यक्तिहरूलाई प्राथमिकतामा राखेर योजना अघि बढाइएको जानकारी दिए। उनले भने, “आरन मेसिनको प्रयोगले कृषक र औजार बनाउने व्यवसायीहरूलाई आधुनिक उपकरण उत्पादनमा सहजता मिल्नेछ र स्वरोजगारको अवसर पनि बढ्नेछ।”

वडा सदस्य मोहन डागीले स्थानिय सीपको संरक्षण तथा प्रवर्द्धनका लागि यस्ता कार्यक्रमलाई निरन्तरता दिइने बताए। महिला सदस्यहरू हुमा घर्ती र माया सुनारले महिलाहरूलाई पनि सिपमूलक कार्यक्रममा समावेश गराउँदै आएको र आगामी दिनमा अझ प्रभावकारी रूपमा कार्यान्वयन गरिने प्रतिबद्धता व्यक्त गरे।

आरन व्यवसायी सालिकराम सुनारका अनुसार, “पहिले हामी फलाम हातैले तताएर औजार बनाउँथ्यौं, तर अहिले प्राप्त मेसिनले काम छिटो र सजिलो हुने देखिएको छ।”

वडा कार्यालयका अनुसार मेसिन प्राप्त गरेका लाभग्राहीहरूले खुँडो, हँसिया, खुकुरी, बन्चरोजस्ता फलामका औजार उत्पादन गर्ने सम्भावना बढेको छ, जसले स्थानीयस्तरमै औजार उत्पादनलाई प्रोत्साहन गर्ने विश्वास गरिएको छ। कार्यक्रमको सञ्चालन वडा सचिव मोहन पौडेलले गरेका थिए।