प्रेस सेन्टर नेपालले विभिन्न माग राखी सञ्चार मन्त्रीलाई बुझायो ज्ञापनपत्र 

काठमाडौं । प्रेस सेन्टर नेपाल केन्द्रीय समितिले आज सरकारसमक्ष विभिन्न माग तथा सुझावसहितको ज्ञापनपत्र बुझाएको  छ।

प्रेस सेन्टर नेपाल, केन्द्रीय समितिले पत्रकारको हत्या, आक्रमण, भौतिक तथा पेशागत असुरक्षा, प्रेस स्वतन्त्रता हनन्का घट्नाको बढोत्तरी र बन्दै गरेको सञ्चारसँग सम्बन्धित कानुनमा प्रेस तथा अभिव्यक्ति स्वतन्त्रतालाई संकुचन गर्ने कतिपय प्रावधानप्रति ध्यानाकर्षण गराउँदै सञ्चार तथा सुचना प्रविधिमन्त्री माननीय पृथ्बीसुब्बा गुरुङ र सचिव राधिका अर्याललाई पाँचौ महाधिवेशनबाट पारित ‘काठमाडौं घोषणापत्र’सहित १५ बुँदे ज्ञापनपत्र बुझाएको छ । ज्ञापनपत्र बुझाउने क्रममा संगठनका केन्द्रीय अध्यक्ष कमल गिरी नेतृत्वको प्रतिनिधिमण्डलमा उपाध्यक्ष लक्ष्मण खड्का, महासचिव मनोज घर्तीमगर, उपमहासचिव ज्ञानप्रसाद पौडेल, उपमहासचिव बुद्ध लोप्चन, सचिव सुरेन्द्र चालिसे, सचिव नन्दलाल तिवारी लगायत उपस्थित हुनुहुन्थ्यो ।

ज्ञापनपत्र बुझ्दै मन्त्री गुरुङले प्रेस सेन्टर नेपालले ज्ञापनपत्रमार्फत् बुझाएका जायज मागको यथोचित सम्बोधन गर्ने बताउनुभयो । त्यस्तै सचिव अर्यालले सञ्चारसँग सम्बन्धित कानुन निर्माणको क्रममा प्रेस सेन्टरसहितका सञ्चार सम्बद्ध संगठनसँग आवश्यक राय लिई, समन्वय र सहकार्य गर्ने विश्वास व्यक्त गर्नुभयो ।

आजै प्रेस सेन्टर नेपालले प्रदेश सरकार र प्रमुख जिल्ला अधिकारीमार्फत् देशैभरी ज्ञापनपत्र बुझाएको छ ।