दाङको राप्ती बबई क्याम्पसमा नेविसंघका प्रमोद भण्डारीको प्यानल विजयी

दाङ । दाङको राप्ती बबई क्याम्पस, तुलसीपुरमा भएको स्वतन्त्र विद्यार्थी युनियनको निर्वाचनमा नेपाल विद्यार्थी संघ (नेविसंघ)को प्यानल विजयी भएको छ। मंगलबार सार्वजनिक भएको अन्तिम मतपरिणाम अनुसार, नेविसंघका उम्मेदवारहरूले विजय प्राप्त गरेका हुन्।

३ हजार ३ सय मतदाता रहेको क्याम्पसमा १,४१७ मत खसेको थियो।मतपरिणाम अनुसार, संयुक्त विद्यार्थी समूहलाई पछि पार्दै नेविसंघका उम्मेदवार प्रमोद भण्डारी अध्यक्ष पदमा निर्वाचित हुनुभएको छ। उहाँले विद्यार्थी संगठनको गठबन्धनका उम्मेदवार लेखमणि खत्रीलाई पराजित गर्नुभएको हो।
अध्यक्षका स्वतन्त्र उम्मेदवार कोमल बहादुर वली (केबी) र कृष्ण केसी (डेबिट)ले पनि उम्मेदवारी दिनुभएको थियो। सचिव पदमा नेपाल विद्यार्थी संघका टोप बहादुर ओली निर्वाचित हुनुभएको छ,उहाँले गठबन्धनका उम्मेदवार सोनिया थापालाई पराजित गर्नुभएको छ।

कोषाध्यक्ष पदमा नेपाल विद्यार्थी संघकी शिक्षा नेपाली निर्वाचित हुनुभएको छ,उहाँले गठबन्धनका उम्मेदवार तिलक राज डाँगीलाई पछाडि पारेर विजय प्राप्त गर्नुभएको छ।
सदस्य पदमा मनिशा चौधरी, रूपेश चौधरी, यम कुमारी भण्डारी, सन्जिव चौधरी, ममता वली, करूणा नेपाली, र लक्ष्मण वली निर्बाचित हुनुभएको निर्वाचन समितिले जनाएको छ।