वाणिज्य संघ भित्र सबैको समान अस्थित्व स्थापित गर्न चाहन्छौ : विश्व बस्नेत

तुलसीपुर उद्योग वाणिज्य संघको यहि शनिबार अर्थात बैशाख २९ गते हुन लागेको निर्वाचनमा ललित जंग शाह नेतृत्वको संयुक्त ब्यवसायिक प्यानलको तर्फबाट उद्योग उपाध्यक्षका उम्मेदवार विश्व बस्नेतसंग गरिएको कुराकानीको सार :

१. तपाईंको व्यवसायीक यात्राको अनुभव के छ ?
म सानोमा हुँदा खेलकुद र टेक्नोलजीमा बढी रुचि थियो । मेरो अधिकांश समय त्यसमै बित्ने गर्दथ्यो । म मेरो परिवारकै कारण व्यवसायमा जोडिएको हुँ । मेरो हजुरबुवा डिल्ली बहादुर बस्नेत उद्योग वाणिज्य संघको संस्थापक अध्यक्ष हुनुहुन्छ । म कक्षा १२ पुरा गरेपछि माथिल्लो शिक्षा लिदै गर्दा साइन्स लिएर कलेज भर्ना भएँ । तर उद्देश्य डाक्टर पढ्ने थियो । तर त्यही बिचमा घर परिवारमा व्यवसायकै बारेमा छलफल भयो । त्यसपछि स्नातक तहको पढाइ बिजनेशबाट गरेँ । त्यसबीचमा म थुप्रै व्यावसायिक प्रतिष्पर्धामा भाग लिने मौका पाएँ । त्यसपछि मलाई व्यवसाय क्षेत्रमा इच्छा लागेको हो ।

 २. कति वर्षको उमेरमा व्यवसाय शुरु गर्नुभएको थियो ?
म स्नातक पढ्दै गर्दा कलेजमा दराज कम्पनीले एउटा कार्यक्रम गरेको थियो । कम्पनीले अन्तर्राष्ट्रियस्तरमा व्यापार गर्दै गर्दा के कस्ता समस्या छन् ? त्यसलाई सुधार गर्न सकिने उपाय के हुन सक्छन् भन्ने सवालमा कार्यक्रम गर्दथ्यो । त्यो कार्यक्रममा हाम्रो कलेजले गरेको आइडिया टप थ्रि मा परेर सम्मानित भयो । त्यसमा पहिलो पुरस्कार पाइसकेपछि र कलेजमा पनि नयाँ नयाँ कुरा सिक्दै जाँदा मैले २० वर्षको उमेरमा , कोभिड शुरु हुँदै गर्दा पहिलो व्यवसाय सुरुवात गरेको थिएँ ।

 ३. कुन व्यवसाय थियो ?
म सानैदेखि खेलकुद र टेक्नोलोजीसँग नजिक भएका कारण एपबाटै खेलाडीलाई खेल्ने ठाउँसम्म जोडने व्यवसाय शुरुवात गरेको थिएँ । सन् २०२० मा सुरुवात गरियो तर कोभिड शुरु भएका कारणले व्यवसायलाई निरन्तरता दिन केहि कठिनाई भए । करिब ९ महिना केही गर्न पाएनौँ । तर पनि घरमै बसेर सोसल मिडियाबाटै काम गरेर भएपनि करिब ४ हजार जना ग्राहक बनाइसकेका थियौँ । २०२० मा कोभिड शुरु भएपछि केही समस्या भएपनि अहिले १४ हजार बढी ग्राहक बनाइसकेका छौँ । यसरी मेरो व्यापारिक यात्रा शुरु भएको थियो भने घरमा भने गणपति मिल छ, त्यसबाट धेरै कुरा सिक्ने मौका पाएको हुँ ।

 ४. तपाईँलाई अहिले मतदाताले किन जिताउने ?  
सबैभन्दा पहिला कुरो त आम मतदाताले युवा नेतृत्व खोजिरहनुभएको छ । उद्योग वाणिज्य संघमा मात्र नभएर अन्य संघ संस्थामा पनि यो कुराहरू उठिरहन्छ । मेरो उम्मेदवारी यसपक्षबाट हो । तर कुरा यतिमा सिमित रहदैँन । आइडिया दिन सक्ने युवा नेतृत्व चाहिन्छ । जसले म केही गर्न चाहन्छु, दिशा देखाउन सक्छ , त्यसलाई नै मतदाताले खोज्नुभएको हो । त्यसकारण मैले उद्योग उपाध्यक्षमा उम्मेदवारी दिएको हुँ ।

 ५. तपाईँका व्यावसायिक एजेण्डा के छन् ?
मेरा व्यावसायिक एजेन्डा तीन कुरा प्राथमिकतामा छन् । पहिलो एजेन्डा भनेको युवालाई व्यवसायमा सफल कसरी बनाउन सकिन्छ भन्ने नै हो । हाम्रो प्यानल भनेको साना पुँजीका व्यवसायीदेखि ठुलो पूँजीका सबै किसिमका व्यवसायी जोडिएको प्यानल हो । सबै प्रकारका विचार अटाउने गरि बनाएको प्यानल हो । तेस्रो कुरा तुलसीपुर बजारलाई प्राथमिकता दिएर सुन्दर र सभ्य तुलसीपुर बनाउने हो । अनि तुलसीपुरलाई अन्य सहरसँग व्यावसायिक यात्रामा जोड्न सकिने विषय पनि छ । यसकारण पनि हाम्रो प्यानल चुनावी मैदानमा छ ।

 ६. नेतृत्वमा आउन अलि हतार भयो कि भन्छन् नि ?
हो तपाईंले भनेजस्तै मलाई कतिपयले यो किसिमको प्रश्न गर्नुहुन्छ । तर मलाई त्यस्तो लाग्दैन । उमेरलाई हैन्, कर्मलाई हेर्नुपर्छ भन्ने हो । हामीले कर्म कति राम्रो गर्न सक्छौँ भन्ने हो । यो शिक्षा मलाई घरपरिवारबाटै मिलेको हो । अहिले भइरहेका काम र आगामी दिनमा गर्न सकिने कामका बारेमा पूर्ण प्रतिवद्ध छु ।

अन्तमा केही भन्नु छ की  ? 
तुलसीपुरको समृद्धि नै हाम्रो समृद्धि हो । समृद्धि कतैपबाट टपक टिपरेर ल्याउने कुरा हैन । त्यो हामीहरुले गर्ने कर्ममा भर पर्छ । हाम्रा व्यवसायीक मुद्दा कस्ता हुन्छन ? हाम्रो उद्देश्य र लक्ष्य के हो ? त्यसमा क्लियर हुन आवश्क छ । त्यसका लागि विभिन्न राजनीतिक आस्थाका कारण कुनै बेला भाँचिएका हाम्रा मन र भावनाहरु एक ठाउँमा जोडिन आवश्यक छ । हामी कसैलाई निषेध गरेर अगाडी बढ्दैनौ । व्यवसायीको नेतृत्व गर्ने छाता संगठन तुलसीपुर उद्योग वाणिज्य संघ भित्र विभाजन आउनु दुःखद कुरा हो ।

तर हामी वाणिज्य संघ भित्र सबैको समान अस्थित्व स्थापित गर्न चाहन्छौ । पैसाकै कारणले कर्मठ, योग्य र सक्षम व्यवसायीलाई पाखा लाग्ने अवस्थाबाट मुक्ता गर्न चाहन्छौ । हाम्रो लडाई यसका विरुद्ध पनि हो । त्यस कारण तिबेला आम व्यवासायी मतदाताले व्यवसायीक उत्पिडनका विरुद्ध हामीलाई आफ्नो अमूल्य भोट दिएर न्याय गर्नुहुनेछ भन्ने अपेक्षामा सयुंक्त प्यानलका हामी उम्मेदवार बसेका छौ । हाम्रो जित नै आम तुलसीपुरबासी व्यवसायीको जित हो।