तुलसीपुरमा पुस ४ देखि १९ गतेसम्म घरेलुको प्रथम महोत्सव-२०८२ हुने

तुलसीपुर। तुलसीपुरमा आगामी पुस ४ गतेदेखि १९ गतेसम्म प्रथम घरेलु तथा साना औद्योगिक, सांस्कृतिक, पर्यटन, कृषि, व्यापारिक तथा प्रविधि प्रदर्शनी महोत्सव–२०८२ आयोजना हुने भएको छ।

नेपाल घरेलु तथा साना उद्योग महासंघ तुलसीपुरका अध्यक्ष लालबहादुर केसीले आइतबार पत्रकार सम्मेलनमार्फत महोत्सवको उद्देश्य तथा तयारीबारे जानकारी गराउँदै स्थानीय सबै पक्षको सहकार्यमा मेला भव्य रूपमा सम्पन्न गरिने बताउनुभयो। उहाँका अनुसार महोत्सवले घरेलु उद्योग, स्थानीय उत्पादन, पर्यटन प्रवर्द्धन तथा साना उद्यमीको व्यवसाय विस्तारमा सहयोग गर्नेछ।

कार्यक्रमको सञ्चालन महासंघका महासचिव भद्रबहादुर ओलीले गर्नुभएको थियो। पत्रकार सम्मेलनमा नेपाल पत्रकार महासंघ दाङका अध्यक्ष सन्तोष सुवेदी, उपाध्यक्ष ओपेन्द्र बस्नेत सहित विभिन्न क्षेत्रका सरोकारवालाको उपस्थिति थियो।

यसैबीच तुलसीपुर फेन्सी व्यवसाय समितिका अध्यक्ष नरेन्द्रकुमार डाँगीले पौष महिनामा मेला सञ्चालन गर्नु उपयुक्त नहुने भन्दै आम व्यावसायिको भावना कदर गर्न आयोजकलाई आग्रह गर्नुभएको छ। उहाँले भन्नुभयो, “पौष महिनामा मेला महोत्सव गर्नु भनेको स्थानीय व्यवसायलाई दबाबमा पार्ने हो। आयोजक तथा स्थानीय सरकारले पुनर्विचार गर्नुपर्छ।”