मनिकापुर-कुहिरेपानी जलाशयमा डुङ्गा सञ्चालन शुभारम्भ हुँदै

तुलसीुर- तुलसीपुर उपमहानगरपालिका–२ अन्तर्गत भ्युडहर सुनपुर सामुदायिक वन र कुहिरोपानी मनकापुरको बीचमा रहेको मनिकापुर–कुहिरेपानी जलाशय (ड्याम) मा अब डुङ्गा सञ्चालन सुरु हुने भएको छ।

शुभ दीपावली र छठ पर्वको अवसर पारेर आगामी असोज २९ गते बिहान ११ बजे ड्याम परिसरमा डुङ्गा सञ्चालन कार्यक्रमको औपचारिक उद्घाटन गरिने तयारी भएको छ।

उद्घाटन कार्यक्रमका लागि आवश्यक तयारी र व्यवस्थापन कार्य हाल तीव्र गतिमा अगाडि बढाइँदैछ। ड्यामको दीर्घकालीन संरक्षण, प्रभावकारी व्यवस्थापन तथा आगन्तुक पर्यटकलाई सहज सुविधा प्रदान गर्ने उद्देश्यले विभिन्न पूर्वाधार निर्माणका योजना पनि अघि सारिएका छन्।

कार्यसमिति अध्यक्ष भीमबहादुर ओलीका अनुसार, यो क्षेत्रलाई आकर्षक पर्यटकीय गन्तव्यका रूपमा विकसित गर्ने लक्ष्यका साथ कार्य अघि बढाइएको छ।

उद्घाटन पूर्व अवलोकन तथा तयारी कार्यक्रममा तुलसीपुर–२ का वडा अध्यक्ष भीमबहादुर योगी, वडा सदस्य गोवर्धन दाहाल, वडा सचिव सन्तोष न्यौपाने, ड्याम निर्माण समिति तथा कार्यसमिति सदस्यहरू सहभागी रहेका थिए।

समितिमा अध्यक्ष भीमबहादुर ओली, सचिव तिलक डाँगी, सदस्यहरूमा अम्बिका योगी, राजकुमार केसी, ढुण्डिराज न्यौपाने, गौरा भण्डारी, पूर्णबहादुर भण्डारी, चनकलाल, अशोक योगी, खिमा डाँगी र बाटुली चौधरी रहेका छन्।

कार्यसमिति अध्यक्ष ओलीले दाङ जिल्ला तथा आसपासका वडामा बसोबास गर्ने सबै नागरिकलाई असोज २९ गते बिहान ११ बजे हुने डुङ्गा सञ्चालन उद्घाटन कार्यक्रममा उपस्थित भई सहभागिता जनाउन हार्दिक आमन्त्रण गर्नुभएको छ।