तुलसीपुर चेम्बरको आयोजनामा फाुगन १ गतेदेखि १६ सम्म ‘दोस्रो तुलसीपुर महोत्सव’ हुने

चेम्बरले आइतबार आयोजना गरेको पत्रकार सम्मेलनमा कृषि, व्यापार, पर्यटन प्रबर्द्धन र कला संस्कृति संरक्षणका लागि आगामी फागुन १ गते देखि १६ गते सम्म महोत्सव संचालन गर्ने जानकारी दिएको छ ।

तुलसीपुर चेम्बर अफ कमर्स का अध्यक्ष ऋषिराज भण्डारीले चेम्बरको आफ्नै भवन निर्माणार्थ महोत्सव लगाउन लागिएको जानकारी दिनुभयो । महोत्सव तुलसीपुर–६ घोराहीरोडदेखि उत्तरतर्फ रहेको मैदानमा संचालन हुन लागेको हो । स्थानीय वस्तुको बजारीकरण, पर्यटकीयस्थलको प्रचारप्रसार र स्थानीय कला संस्कृतिको संरक्षण गर्ने उद्देश्य रहेको अध्यक्ष भण्डारीको दाबी छ ।

अध्यक्ष भण्डारीका अनुसार महोत्सवमा कृषिजन्य वस्तुको प्रदर्शनी, औद्योगिक प्रर्दशनी, हस्तकला, अटोमोवाइल्स, मेसिनरी तथा वित्तिय सूचना प्रविधिको प्रदर्शनी हुने छ ।यस्तै विभिन्न जातजातीको खानाको प्रदर्शनी, पर्यटकीय स्थलको प्रचारप्रसार हुने साधनको प्रदर्शनी, स्थानीय तथा राष्ट्रिय कलाकारको प्रस्तुती, स्थानीय कला संस्कृति झल्कने नृत्य तथा झाँकी, बालउद्यान रहने चेम्बरका महासचिव दुर्गा शर्माले जानकारी दिनुभयो ।

महोत्सव स्थल प्रवेशका लागि १०० रुपैँयाको टिकट शुल्क लाग्ने  छ। यसैगरी ७० वर्ष माथिका जेष्ठ नागरिकले निशुल्क प्रवेश पाउने र विद्यार्थीलाई ५०रुपैँया मात्र तोकिएको छ । चेम्बरले तुलसीपुर उपमहानगरपालिकालाई २५ लाख राजश्व बुझाएर महोत्सव संचालनको अनुमति लिएको हो । महोत्सवमा स्थानीय व्यवसायीलाई २० प्रतिशत छुटमा स्टल प्रदान गरिने चेम्बरका उपाध्यक्ष सन्तोष खड्काले जानकारी दिनुभएको छ ।

कार्यक्रममा पुर्ब अध्यक्ष टोप बहादुर घर्ती,प्रेस सल्लाहकार गोपाल शर्मा भट्टराई लगायतको उपस्थित रहेको थियो। महोत्सव आउँदो फाुगन १ गतेदेखि १६ गतेसम्म लाग्नेछ।