दाङका निजी विद्यालयलाई कडा टक्कर दिने तुलसीपुर सेन्टरले मनायो आफ्नो ५४ औं वार्षिकोत्सव

तुलसीपुर,दाङ । तुलसीपुर उपमहानगरपालिका-६ मा रहेको माध्यामिक विद्यालय तुलसीपुर सेन्टरले आफ्नो ५४औं वार्षिकोत्सव तथा अभिभावक भेला सम्पन्न गरेको छ।

आइतबार विद्यालय व्यवस्थापन समितिका अध्यक्ष लेखतराम पौडेलको अध्यक्षता तथा तुलसीपुर उपमहानगरपालिकाका नगर प्रमुख टिकाराम खड्काको प्रमुख आतिथ्यतामा कार्यक्रम सम्पन्न भएको हो।

कार्यक्रमका प्रमुख अतिथि खड्काले भन्नुभयो,’सामुदायिक विद्यालयहरूको शैक्षिक र भौतिक प्रगतिमा मावी तुलसीपुर सेन्टरले खेलेको भूमिकाको प्रशंसा योग्य छ । विद्यालय, अभिभावक र समुदायबीचको सहकार्यलाई अझ सुदृढ बनाउँदै सामुदायिक विद्यालयको महत्व बढाउन योगदान दिन आग्रह  गर्दछु।’

यस्तै तुलसीपुर उपमहानगरपालिका शिक्षा शाखाका अधिकृत मनबहादुर खड्काले भन्नुभयो, ‘जिन्दगी आइसक्रिम जस्तै हो। यसलाई विद्यार्थीहरूले कसरी उपयोग गर्छन्, त्यो महत्त्वपूर्ण छ।’ सोही कार्यक्रममा तुलसीपुर मेट्रो कलेजका प्रमुख बसन्त आचार्यले सामुदायिक विद्यालयहरू धारासायी भए भन्ने भाष्यलाई मावि सेन्टर तुलसीपुरले गलत साबित गरेको बताउनु भयो ।

सोही कार्यक्रममा अभिभावक तर्फबाट बोल्नुभएका केपी भण्डारीले भन्नुभयो,’मैले यही बर्ष बाट मात्र मेरो छोरी भर्ना गरेको हु। मैले सोचे भन्दा राम्रो शिक्षा दिएको कारण आफु मात्र नभै अतिरिक्त क्रियाकलापमा चासो राख्ने छोरी समेत खुशीले पढेको अबस्था छ।’ यसैगरी  हापुरे माविका प्रधानाध्यापक जीतबहादुर खत्रीले माबि सेन्टरबाट आफुहरुले धेरै सिक्ने कुरा रहेको बताउनुभयो ।

विद्यालयका प्रधानाध्यापक भागवत पौडेलले वार्षिक प्रगति प्रतिवेदन प्रस्तुत गर्दै हाल विद्यालयमा २ हजार ५ सय बढी विद्यार्थी अध्ययनरत रहेको जानकारी दिनुभयो । प्राविधिक शिक्षामा ६०० विद्यार्थी र निःशुल्क शिक्षामा २०० विद्यार्थी अध्ययनरत रहेको समेत उहाँले जानकारी दिनुभयो ।

कार्यक्रममा विद्यार्थीहरूले विभिन्न जातजातिको पहिचान झल्किने सांस्कृतिक प्रस्तुतिहरु देखाउनुभएको थियो। जसले गर्दा स्थानीय संस्कृति र परम्पराको संरक्षण र प्रवर्द्धनमा समेत विद्यालयको मेहनत हेर्न लाएक बनेको थियो। प्रअ पौडेलका अनुसार हाल विद्यालयमा अतिरिक्त क्रियाकलाप अन्तर्गत मार्सल आर्ट, खेलकुद, नृत्यजस्ता कार्यक्रम सञ्चालन हुँदै आएका छन्। यसले विद्यार्थीहरूको शारीरिक, मानसिक, र सृजनात्मक क्षमताको विकासमा थप योगदान गरेको छ।

पूर्व शिक्षक सूर्यप्रसाद पौडेल, तुलसीपुर उपमहानगरपालिका  वडा नं. ६ का कार्यवाहक अध्यक्ष यमुना परियार, पत्रकार सुशील बस्नेत,जनश्रम माविका प्रधानाध्यापक माधव भट्टराई लगायतले बिद्यालयको प्रगतिले आफुहरु खुशी भएको भन्दै थप सपलताको शुभकामना दिनुभएको थियो।

मेघा विद्यालयको सूचीमा पर्न सफल,सामुदायिक विद्यालयहरूको उत्कृष्ट उदाहरणका रूपमा स्थापित बन्दै गएको विद्यालय माबि सेन्टरका व्यवस्थापन समितिका सदस्य सुरेश रावतको स्वागत मन्तव्यबाट सुरु भएको कार्यक्रमको सञ्चालन शिक्षक भोला पौडेल र शिक्षिका मेनका भण्डारीले गर्नुभएको थियो।