देश बदल्ने कामको अगुवाइ गर्ने जिम्मा मेरो हो : प्रधानमन्त्री ओली

दाङ । प्रधानमन्त्री केपी शर्मा ओलीले देश बदल्ने कामको अगुवाइ आफुले गर्ने बताउनुभएको छ। ‘हामी अलमल नगरी मिसन २०८४ तर्फ लाग्नु पर्छ, तपाईँहरूको साथ अहयोग चाहिन्छ, देश बदल्ने कामको अगुवाइ गर्ने जिम्मा मेरो हो, कसैले पनि यो अभियानलाई रोक्न सक्दैन’, प्रधानमन्त्री ओलीले भन्नुभयो ।

शोमबार दाङको घोराहीमा आयोजित जनसभालाई सम्बोधन गर्दै प्रधानमन्त्री ओलीले नेपाल अब सुरुङ मार्ग ,पानी जहाज र आइटिको नयाँ युगमा प्रवेश गरिसकेको बताउनुभएको छ ।‘पहिला मैले सुरुङका कुरा गर्दा धेरैले गिज्याए, रेलका कुरा गर्दा धेरैले गिज्याए, अहिले जनकपुरमा त रेल चलिरहेको छ, त्यो विस्तार हुँदै छ, पानी जहाजका कुरा गर्दा धेरैले जिस्क्याए, अब नारायणी नदीबाट तपाईँहरू जलयात्रा सुरु गर्न सक्नुहुन्छ, त्यसलाई गंगासम्म लैजान सक्नु हुन्छ, त्यहाँबाट बङ्गाल जान सक्नुहुन्छ’, उहाँले भन्नुभयो । प्रधानमन्त्री ओलीले पुष्पलाल मार्ग, मदन भण्डारी मार्ग,हुलाकी मार्ग निर्माणको काम अघि बढेको भन्दै एमालेको नेतृत्वले मात्र देश विकास गर्न सक्ने बताउनुभयो।

यसैगरी शंकर पोखरेललाई चुनाव जिताएर नपठाउँदा समग्र दाङको विकास निर्माणको अभियान अघि बढाउन आफूलाई केही समस्या भएको बताउनुभयो । ओलीले अब हाइ काढेर बस्ने होइन,सभामा देखाएको सक्रियता देखाएर मिसन २०८४ लाई सफल बनाउन नेता कार्यकर्तालाई निर्देशन समेत दिनुभएको छ ।

प्रधानमन्त्री ओलीले आफु नेतृत्वको अहिलेको सरकार, शान्ति, स्थायित्व, विकास, गरिबी निवारण लगायतका उद्देश्यले बनेकोले सोही कुरालाई मूल उद्देश्य बनाएर अझै तिन बर्ष सम्म चल्ने दाबी गर्नुभयो ।

यसैगरी सोही सभालाई सम्बोधन गर्दै नेकपा एमालेका महासचिव शंकर पोखरेलले सरकारले जारी गरेका ६ वटा अध्यादेश संसदबाट पारित भएरै छाड्ने बताउनु भएको छ । एमाले दाङले आज घोराहीमा गरेको जनसभालाई सम्बोधन गर्दै अध्यादेश संसद छल्न नभई जनतासँग प्रत्यक्ष जोडिएका काम छिटोछरितो गर्नकालागि ल्याइएको बताउनुभयो ।